FİRƏNGOTU (Lobelia) – firәngotukimilәr fәsilәsindәn bitki cinsi (bәzәn F. zәngçiçәklilәr fәsilәsinә aid edilir). Birillik vә çoxillik otlar, yarımkollar vә kollardır; Yarpaqları sadә, növbәlidir. Çiçәklәri qeyri-müntәzәm, iki vә ya birdodaqlı, ikicinsiyyәtlidir. Erkәkciklәri dişicik ağzının keçdiyi sütuncuqlu boruya bitişmişdir. Meyvәsi qutucuqdur. Amerika vә Afrikanın tropik vә subtropik qurşaqlarının rütubәtli yerlәrindә 350-yәdәk növü mәlumdur. Asiya, Avstraliya vә Okeanıyada azdır; Avropada ancaq 2 növü, Azәrb.-da 1 növü – adi F. (L. erinus) mәlumdur. Dekorativ bitki kimi bağlarda vә parklarda әkilmәk üçün yetişdirilir. Bәzi növlәrin yerüstü hissәlәrinin tәrkibindә lobelin alkaloidi olduğu üçün dәrman bitkisi kimi istifadә edilir.

 Adi firәngotu (Lobelia erinus).