FİRUZABAD – İranın Fars ostanında şәhәr. Firuzabad şәhristanının mәrkәzi. Əh. 65,4 min (2016). Zaqros d-rının c.-ş. hissәsindә, Şiraz ş.-ndәn 80 km c.-da, dәniz sәviyyәsindәn 1322 m yüksәklikdә yerlәşir.

 I Ərdәşirin sarayının xarabalıqları. Firuzabad (İran).

Vaxtilә F.-ın yerindә salınmış Qur ş.-ni Makedoniyalı İsgәndәr dağıtmışdır (F.-ın әtrafında Qurun dairәvi planda xarabalıqları qalmışdır). I Ərdәşir [226–241] şәhәri bәrpa etdirәrәk paytaxt elan etmişdir. Şәhәrin mәrkәzindә “müqәddәs” odun yandığı kvadratşәkilli qüllә yerlәşirdi. I Ərdәşirin daşdan tikilmiş simmetrik planlı, üçgümbәzli zallları vә daxili hәyәti olan sarayının (224), Qalaye-Doxtәrin (Qız qalası; 3 әsr) xarabalıqları, hәmçinin 2 qayaüstü relyef qalmışdır.