FİŞER (Fisher) Robert Ceyms (Bobbi)  (9.3.1943, Çikaqo – 17.1.2008, Reykyavik) – ABŞ idmançısı (şahmat); beynәlxalq qrossmeyster (1958). Şahmat tarixindә 11-ci dünya çempionu (1972–1975). 8 dәfә ABŞ çempionatlarının qalibi olmuş (digәrlәrindә çıxış etmәmişdir), onlarda 90 partiya oynamış vә 74 xal (82,2%) toplamışdır; zonalararası turnirlәrin – Stokholm (1962), Palma-de-Malyorka (1970) vә iri beynәlxalq turnirlәrin – Mardel-Plata (1960), Reykyavik (1960), Skopye (1967), Rovin vә Zaqreb (1970), Buenos-Ayres (1970) vә s.-in qalibi olmuşdur. O, fantastik iş qabiliyyәti vә hәr partiyada qәlәbәyә canatma, axırıncı gedişә qәdәr mübarizә gәrginliyini saxlamaq bacarığı, hәr rәqibә fәrdi psixoloji yanaşması, ensiklopedik biliyi vә nadir yaddaşı ilә fәrqlәnirdi. F.-in qәlәbәlәri ABŞ-da şahmat bumu yaratmış, bütün dünyada şahmatın populyarlaşmasına vә inkişafına gәtirib çıxarmışdır.