FİZO TƏCRÜBƏSİ – hәrәkәtedәn mühitlәrdә işığın sürәtinin tәyin edilmәsinә aid tәcrübә. Fransız fiziki A.İ.L.Fizo 1851 ildә göstәrdi ki, işıq hәrәkәtedәn mühit tәrәfindәn qismәn sövq edilir. Belә mühitdә işığın faza sürәti c/n ± α υ-yә bәrabәrdir, burada c/n – işığın tәrpәnmәz mühitdә sürәti, n – mühitin sındırma әmsalı, υ – mühitin müşahidәçiyә nәzәrәn sürәti (yәni laboratoriya hesablama sistemindә), α – sövqetmә әmsalı, “+” vә “–” işarәlәri işığın vә mühitin sürәtinin eyni vә әks istiqamәtlәrinә uyğundur. F.t. daha әvvәl fransız fiziki O.J.Frenelin sövqetmә әmsalı üçün aldığı α =1–1/n² düsturunu tәsdiq etdi.

F. t-nin prinsipial sxemi şәkildә göstәrilmişdir. L mәnbәyindәn gәlәn şüa yarımşәffaf lövhә tәrәfindәn iki şüaya ayrılır, biri S güzgülәrindәn әks olunaraq T borularında axan suyun hәrәkәti istiqamәtindә, digәri isә әks istiqamәtdә keçir. Hәr iki şüa I interferometrinә yönәldilir vә interferensiya mәnzәrәsi müşahidә olunur. Ölçmә әvvәlcә hәrәkәt etmәyәn suda, sonra isә hәrәkәtedәn suda aparılmışdır. İnterferensiya zolaqlarının yerdәyişmәsinә görә hәrәkәtedәn suda şüaların keçmә müddәtlәrinin fәrqi, işığın faza sürәti vә α tәyin edilmişdir.