FLAMENKO, k a n t e f l a m e n k o (isp. flamenco, cante flamenco) – Cənubi İspaniyanın ənənəvi mahnı-rəqs sənəti. Terminin etimologiyası müəyyən edilməmişdir (müxtəlif versiyalara görə isp. flama - alov, flamenko - qızılqaz sözündən və s.). Əndəlisdə yaranmış, formalaşmasına ərəb, Bizans, qaraçı və digər ənənələr təsir göstərmişdir. Özündə oxuma (cante; müğənni - kantaor), rəqs (baile; rəqqas - baylaor) və gitarada ifanı (gitaraçı - takaor) birləşdirir. 2 üslubu: qədim yüksək, dramatik - kante xondo (cante jondo), yaxud kante qrande (cante grande) və daha müasir sadələşdirilmiş - kante çiko (cante chico). Sonuncunu həmçinin ümumi “F.” termini ilə, yaxud “kante flamenko” adlandırırlar. Rəqs solo (məs., kişi rəqsi - farruka), yaxud qoşa ifa edilir; oxumalar da solo (çox vaxt kişilər tərəfindən) olur; adətən, bir və ya iki gitaraçı iştirak edir. F.-nun mühüm tərkib hissəsi ritmdir. F. improvizasiyalı sənətdir, ənənəvi təlim üsulu şifahidir. Rəqqaslardan Antoniya Merse (La Arxentina), Karmen Amayya, Flora Albaysin, Visente Eskudero, Antonio Qades, gitaraçı Pako de Lusiya məşhur F. ifaçılarıdır. F. YUNESKO-nun Bəşəriyyətin qeyri-maddi mədəni irsi siyahısına daxil edilmişdir (2010).
Flamenko rәqsi.
