FLÉMİNQ (Fleming) Aleksander, ser (6.8.1881, Şotlandiya, Lokfild – 11.3.1955, London) – ingilis mikrobioloqu, London Kral Cәmiyyәtinin üzvü (1943), Paris EA-nın üzvü (1946). Nobel mükafatı laureatı (1945, X.U.Flori vә E.B.Çeyn ilә birgә). Fermer ailәsindәndir. London Un-ti nәzdindә tibb mәktәbini bitirmişdir (1906). Londonda Bakteriologiya İn-tunda (1908–14, 1918–54, 1946 ildәn direktor), eyni zamanda (1948–55) London Un-tinin prof.-u, 1951–54 illәrdә Edinburq Un-tinin rektoru işlәmişdir. Əsәrlәri kimyaterapiya, ümumi bakteriologiya vә immunologiya üzrәdir. Bakteriyaları “әridәn” lizosim fermentini kәşf etmişdir (1922); müәyyәn etmişdir (1929) ki, yaşıl kif göbәlәyi onun pensillin adlandırdığı antibiotik maddә ifraz edir.