FLÜOR LİFLƏRİ – flüor tәrkibli polimerlәr (politetraflüoretilen, polivinilidenflüor vә onların sopolimerlәri) әsasında sintetik liflәr. F.l. әrintidәn vә ya mәhluldan quru, ya da yaş üsulla formalanır. Politetraflüoretilen (PTFE) hәll olmadığına vә işlәnmәsi mümkün olmadığına görә PTFE әsasında liflәr yaş üsulla onun lifәmәlәgәtirici polimer mәhlulunda suspenziyasından, sonradan lifәmәlәgәtirici polimeri yandırmaqla alınır. Tetraflüoretilenin sopolimerlәri әsasında liflәr hәm әrintilәrdәn, hәm dә ullardan formalanır. Nanoliflәr (diametri 0,8·10^–7–1,5·10^–6 m) vә onların әsasında toxunmamış materialları flüorpolimerlәrin mәhlullarından elektroformalama üsulu ilә alınır.

 
F.l. әsasında materiallar aqressiv mühitlәrdә davamlıdır, hidrofobdur, yanmır, xüsusi elektrik müqavimәti 10¹⁴–10¹⁸Om·m; PTFE-dәn olan F.l.-nin maksimal istismar temp-ru 260–280°C, nisbi uzanması 25– 35%-dir. Kimyәvi davamlığı yüksәk olduğuna görә F.l. әsasında materiallardan aqressiv mühitlәrin süzülmәsindә, qoruyucu vә xüsusi geyimlәrin, elektrokimyәvi cәrәyan mәnbәlәrinin hazırlanmasında, aviakosmik texnikada istifadә olunur. F.l. bioinert olduğundan, onlardan tibdә tikiş materialları kimi istifadә olunur. F.l. әsasında materialların sürtünmә әmsalının çox aşağı olması (0,02–0,1), onlardan qaldırıcı maşın vә mexanizmlәrin böyük yük altında olan hissәlәrindә antifriksion araqatı kimi istifadә edilmәsinә imkan verir.