FLÜORİDLƏR – flüorun digәr elementlәrlә kimyәvi birlәşmәlәri. He vә Ne-dan başqa bir sıra elementlәrin F.-i mәlumdur. Sadә vә binar F. (әsasәn, hidrogen-flüorid turşusunun duzları, metal vә qeyri-metalların kovalent F.-i, halogen-flüoridlәr), oksiflüoridlәr (mәs., POF₃), metalların hidro-flüoridlәri, flüortәrkibli turşular (mәs., hidrogen-flüorid turşusu), kompleks flüoridlәr vә ya flüormetallatlar (mәs., Na₂NiF₄) ayırd edilir. F.-ә hәmçinin qrafitin flüoridlәri CF_x (1 ≥ x > 0), C(MF_n)_x vә s., flüorid vә oksiflüoridli tunc, qarışıq halogenidlәr aiddir. Nadir-torpaq elementlәrin triflüoridlәri, CaF₂ әn yüksәk temp-rda (t_әr. 2530°C) әriyәn vә az uçucudur; OF₂ vә NF₃ (müvafiq olaraq t_әr. −224 vә −145°C; −206,8 vә −129°C) әn aşağı әrimә vә qaynama temp-rları olan F.-dir.

Suda әn çox SbF3 (100 q suda 25°C-dә 492,4 q), BeF₂, TlF, әn az PbClF, CaF₂, LaF₃ vә ThF₄ (20°C-dә 0,17 mq/l) hәll olur.

Bir çox F. su ilә hidroliz olunur. Bütün F. pirohidrolizә uğrayır. Qeyri-metalların F.-dәn (KrF₂, XeF₆, halogen-flüoridlәr, OF₂, O₂F₂, NF₃, N₂F₄, NOF₃) onların hidrogen-flüorid turşusunda mәhlulları әn güclü oksidlәşdiricilәrdir. Metalların F.-i arasında OsF₇, ReF₇, PtF₆, PuF₆, AuF₅, CrF₅, MnF₄, CrF₄, AuF₃, NiF₃ vә s. çox güclü oksidlәşdiricilәrdir.