FOLMER (Volmer) Maks (3.5.1885, Hilden, Reynland – 3.6.1965, Babelsberq, Potsdam) – alman fiziki-kimyaçısı. Almaniya EA üzvü (1934 ildәn), Almaniya Demokratik Respublikası EA-nın prezidenti (1955–58) olmuşdur. Leypsiq Un-tini bitirmiş (1910) vә orada işlәmiş, Hamburq Un-tinin (1920–22) vә Berlindә Ali Texniki Mәktәbin (1922–45) prof.-u, eyni zamanda Fiziki-Kimya vә Elektrokimya İn-tunun direktoru olmuşdur. Keçmiş SSRİ-dә işlәmiş (1945–55), SSRİ EA-nın әcnәbi üzvü (1958 ildәn) olmuşdur.

Əsas işlәri sәthi diffuziyanın, yeni fazaların yaranması vә elektrod proseslәrin kinetikasının nәzәri vә tәcrübi tәdqiqinә hәsr edilmişdir. Hidrogenin elektrolitik ayrılmasının kinetikasını tәdqiq etmişdir (1928–30). T.Erdei-Qruzla birlikdә irәli sürdüyü tәsәvvürә görә yükün daşınması bütövlükdә elektrokimyәvi prosesin ölçülәn sürәtini tәyin edә bilәr (1930; yavaş boşalma nәzәriyyәsi). Fazanın әmәlәgәlmәsi proseslәrinin öyrәnilmәsi üzrә geniş eksperimental materialları ümumilәşdirәrәk ifratdoymuş fazadan yeni fazanın yaranması zamanı rüşeymlәrin әmәlә gәlmәsi nәzәriyyәsini inkişaf etdirmişdir (1930). T.Erdei-Qruzla birlikdә metalların elektroçökdürülmәsindә kristalların әmәlә gәlmәsi vә inkişafı nәzәriyyәsini işlәyib hazırlamışdır (1931). Fotokimyәvi reaksiyaların mexanizmini öyrәnmiş, elementar fotokimyәvi proseslәrdә hәyәcanlanmış molekul vә atomların rolunu aşkar etmişdir. Əlavәlәrin iştirakı ilә lüminessensiyanın söndürülmәsi vә fotokimyәvi reaksiyaların lәngimәsini tәsvir edәn tәnliklәr tәklif etmişdir (1919, O.Şternlә birlikdә). Heterogen kimyәvi reaksiyaların kinetikasını tәdqiq (1940–50) vә adsorbsiya olunmuş molekullarda sәthi mütәhәrriklik hadisәsini kәşf etmişdir. Heterogen kataliz mexanizmini izah etmәk üçün bir sıra tәcrübi üsullar hazırlamış vә cihazlar düzәltmişdir (mәs., çoxpillәli diffuziya civә nasosu).