FONTÉYN Marqo (әsl adı vә soyadı Marqaret Hukem, Hookham) (18.5.1919, Raygit – 21.2.1991, Panama) – Britaniya balerinası. Şanxay vә Londonda, 1934 ildәn “Sedlers-Uells balle” (London, indiki Kral baleti) mәktәbindә tәhsil almış, sәhnәyә ilk çıxışı da bu truppa ilә olmuşdur (1935 ildәn aparıcı solist, 1974 ildәn qastrol artisti kimi fәaliyyәt göstәrmişdir). Xoreoqraf F.Aştonla uzun müddәt әmәkdaşlıq etmәsi (“Pәrinin öpüşü”, İ.F.Stravinski; “Dante sonatası”, F.Listin musiqisi әsasında; “Noktürn”, F.Dilius; “Simfonik variasiyalar”, S.Frankın musiqisi әsasında vә s.) F.-in sәnәtkar kimi formalaşmasına tәsir göstәrmişdir. R.Peti (Pişik – “Gecә qızları”, J.Franse; Yeva – “İtirilmiş cәnnәt”, M.Konstan; Melizanda – “Pelleas vә Melizanda”, A.Şönberqin musiqisi әsasında), K.Makmillan (Cülyetta – “Romeo vә Cülyetta”, S.S.Prokofyev), C.Kranko (Qadın – “Ekstaz poeması”, A.N.Skryabinin musiqisi әsasında) vә b.-nın balet tamaşalarında әsas partiyaları ifa etmişdir. 1960-cı illәrin әvvәllәrindәn (15 ildәn çox R.X.Nuriyevin daimi partnyoru olmuşdur (Aşton 1963 ildә bu mәşhur duet üçün Listin musiqisi әsasında “Marqarita vә Arman” baletini hazırlamışdır). Digәr rolları arasında: Jizel (“Jizel”, A.Adan), Avrora vә Odetta – Odilliya (“Yatmış gözәl” vә “Sonalar gölü”, P.İ.Çaykovski) vә s. var. 1979 ildә E.Elqarın musiqisi әsasında Aştonun balerinanın 60 illik yubileyinә hazırladığı “Marqo Fonteynin şәrәfinә” tamaşasında çıxış etmişdir. 1954 ildәn Kral Rәqs Akademiyasının (London) prezidenti olmuşdur. 1956 ildә Britaniya imperiyasının ordeni ilә tәltif edilmişdir.