FORMAN Miloş (18.2.1932, Çaslav – 13.4.2018, ABŞ, Danberi) – çex vә amerikan rejissoru. 1954 ildә Praqa Kino Akademiyasının ssenari fakültәsini bitirmişdir. 1954–56 illәrdә televiziyada işlәmişdir. Ssenarist kimi debütü 1958 ildә “Küçüklәr” tragikomediyası vә “Canavar tәlәsi” dramı ilә olmuşdur.1958–62 illәrdә “Laterna magika” şou teatrının (Praqa) dramaturqu vә rej.-u işlәmiş, 1963 ildә “Müsabiqә” sәnәdli, 1964 ildә “Qara Pyotr” bәdii filmlәrini çәkmişdir. “Sarışın qadının sevgi macәraları” (1965) filmi çex kinematoqrafiyası üçün yeni üfüqlәr açmışdır. 1968 ildә ABŞ-a mühacirәt etmiş, burada “Qopma” tragikomediyasını çәkmişdir (1971, Kann Beynәlxalq kinofestivalının Qran-pri mükafatı), “Ququ quşu yuvası üstündәn nәsә uçdu” (1975, 5 “Oskar” mükafatı) filmi ona beynәlxalq nüfuz qazandırmışdır. 1979 ildә Q.Makdermottun “Saçlar” müziklini (hippi hәrәkatı haqqında) ekranlaşdırmışdır.

Çәkdiyi digәr filmlәr: “Reqtaym” (1981), “Amadey” (1984, “Oskar” mükafatı”), “Valmon” (1989, Ş. de Laklonun “Tәhlükәli әlaqәlәr” әsәri üzrә), “Xalq Larri Flintә qarşı” (1996, Berlin Beynәlxalq kinofestivalının “Qran-pri” mükafatı), “İnsan Ayda” (1999, Berlin Beynәlxalq kinofestivalının mükafatı), “Qoyanın kabusları” (2006), “Münxen kabusu” (2012) vә s. Prodüsser vә ssenarist kimi dә fәaliyyәt göstәrmişdir.