FORMFAKTOR e l e k t r o m a q n i t – elektrik yükünün (e l e k t r i k F.-u), yaxud maqnit momentinin (m a q n i t F.-u) hәr hansı mikrosistemin (atomun, atom nüvәsinin) vә ya elementar zәrrәciyin daxilindә paylanmasını xarakterizә edәn funksiya. “F” termini Rentgen şüalarının atomlardan sәpilmәsi nәzәriyyәsindәn götürülüb. Atom F.-u atom elektronlarının (bax Atom faktoru), nüvә F.-u әsasәn nuklonların (protonların vә neytronların) nüvәdә paylanması ilә müәyyәn olunur. Yüksәk enerjili elektronların (vә müonların) adronlardan elastiki sәpilmәsinә aid eksperimentlәrdәn belә nәticә çıxır ki, adronların (mәs., nuklonların, pi-mezonların) elektrik yüklәrinin vә maqnit momentlәrinin paylandığı oblastın ölçüsü 10^–13sm tәrtibindәdir. Bu mәlumatlar bilavasitә sübut edir ki, adronlar mürәkkәb quruluşa malikdir (bax Güclü qarşılıqlı tәsir). Bununla bәrabәr tәcrübә göstәrir ki, elektronun (vә müonun) yük radiusu hәr halda 10^–15 sm-dәn kiçikdir.

 Elektromaqnit F.-una analoji olaraq adronların zәif F.-u, yәni zәif qarşılıqlı tәsir proseslәrindә adronların ölçüsünü xarakterizә edәn F. daxil edilir.