FORTÚNİ, F o r t u n i   M a r s a l (Fortuny Marsal), Fortuni-i-Karbo (Fortuny y Carbó) Mariano (Marian) (11.6.1838, Reus – 21.11.1874, Roma) – ispan boyakarı vә qrafiki. Barselonadakı Zәrif sәnәtlәr mәktәbindә oxumuşdur (1853–1857). Romada tәqaüdçü olmuşdur (1858). Erkәn yaradıcılıq dövrünә adi dini vә tarixi süjetli әsәrlәri (“Müq. Pavel vә areopaq”, akvarel, 1850-ci illәr) akademik üslubda çәkilmişdir. İspaniya-Mәrakeş müharibәsi (1859–60) zamanı batal sәhnәlәri çәkmәk üçün Mәrakeşә göndәrilmişdi; romantik oriyentalizm ruhunda işlәyәrәk, akademik maneradan uzaqlaşmışdır (“Cariyә”, 1861; “Tetuan yaxınlığında döyüş”, 1862–64). 1862 ildәn F. ofort texnikasına müraciәt etmişdir. 1860-cı illәrdәn F.Qoyya vә E.Meysonyenin tәsiri ilә әsәrlәr işlәmişdir. Romantizm ruhunda tarixi tabloların müәllifidir (“Qravüralar kolleksiyaçısı”, 1866; “İspan toyu”, 1870, hamısı Kataloniya Milli İncәsәnәt Muzeyi, Barselona). 1870-ci illәrdә Makkyayoli italyan qrupunun tәsiri ilә realist üsluba müraciәt etmişdir (“Günәş altında çılpaq qoca”, 1871, Prado, Madrid).

 M.Fortuni. “Tetuan yaxınlığında döyüş”. Kataloniya Mili İncәsәnәt Muzeyi (Barselona).