FÓSSA (Cryptoprocta ferox) – viveralar fәsilәsindәn mәmәli; eyniadlı cinsin yeganә növü. Xaricdәn iri, hamartüklü pişiyә bәnzәyir. Süysün hünd. 37 sm-әdәk, bәdәninin uz. 80 sm-ә qәdәr, quyruğu 65 sm-ә yaxın, kütlәsi 9 kq-adәk olur. Ətrafları uzun, pәncәlәri yarımdartıcı iti caynaqlıdır. Üzü nisbәtәn qısa, alnı enli, iri qulaqları girdәdir, vibrislәri çox uzundur. Tükü qısa, sıx, yumşaq, boz-qәhvәyidir. Madaqaskarın әn iri yırtıcısı vә endemikidir; mәrkәzi platodan başqa meşәlәrin hәr yerindә rast gәlinir, dağlara 2000 m-әdәk hünd.-yә qalxır; qida axtarışında savannaya girә bilir. Gecә fәaldır. Əsasәn ağaclarda yaşayır. Müxtәlif tәbii yerlәrdә sığınacaq tapır. Kiçik onurğalılarla (elәcә dә lemurlarla), cücülәrlә qidalanır. Yeyә bilәcәyindәn çox öldürür. Toyuq hininә hücum edәrәk, yerli әhaliyә nәzәrә çarpacaq dәrәcәdә ziyan vurur. Geniş sahәlәrdә (1 km2-ә qәdәr) tәk yaşayır. Dişisi 2–4 bala verir. Cinsi yetkinliyә 4 yaşında çatır. Heyvanxanalarda saxlandıqda 17–20 il yaşayır. Toxunulmamış meşә sahәlәrinin azalması ilә növün sayı azalır. BTMİ-nin Qırmızı siyahısına әsasәn F.-nın vәziyyәti tәhlükәli kimi qiymәtlәndirilmişdir.
Fossa (Cryptoprocta ferox).
