FOŞ (Foch) Ferdinand (2.10.1851,Tarb – 20.3.1929, Paris) – Fransa hәrbi xadimi vә marşalı (1918), B.Britaniya feldmarşalı (1919) vә Polşa marşalı (1923). Fransa Akademiyasının üzvü (1918). Sent-Etyen vә Metsdә yezuit kolleclәrindә tәhsil almışdır. Fransa Hәrbi Akademiyasını bitirmiş (1887), akademiyanın prof.-u (1895–1900) vә rәisi (1907–11) olmuşdur. Napoleon taktikasını vә onun müasir şәraitdә tәtbiqi yollarını araşdırmışdır. Birinci dünya müharibәsi (1914–18) illәrindә Qәrb cәbhәsindәki fransız qoşunlarının baş komandanı gen. J.Joffrun kömәkçisi (1914, oktyabr), “Şimal” orduları qrupunun komandanı (1915 ilin yanvarından) olmuşdur. Joffrun istefasından sonra F. komandanlıqdan uzaqlaşdırılmış vә Hәrbi Tәdqiqatlar Mәrkәzinin rәisi tәyin edilmişdir. 1917 ildәn baş qәrargah rәisi, müttәfiqlәrin Ali hәrbi şurasının üzvü, 1918 ilin martından müttәfiq qoşunlarının ali baş komandanı, 1919 ildәn Antantanın Ali hәrbi şurasının sәdri olmuşdur. 1920 ilin yanvarında Paris sülh konfransı (1919–20) Ali Şurasının iclasında mәruzә ilә çıxış edәrәk Qafqaza bir neçә diviziya göndәrmәyi zәruri saymış vә hesab etmişdir ki, yalnız hәrbi qüvvә ilә Qafqazın bolşevik işğalı tәhlükәsindәn xilası mümkündür. Rur vilayәti işğalının (1923) tәşәbbüskarlardan biridir. Hәrbi nәzәriyyәyә dair әsәrlәrin vә memuarların müәllifidir. Fәxri legion ordeninin Böyük xaç nişanına (1915) layiq görülmüşdür.