FOTİNİYA (Photinia) – gülçiçәklilәr fәsilәsindәn bitki cinsi. Hәmişәyaşıl, yaxud qışda yarpağını tökәn ağac vә ya kollardır. Çiçәklәri beşüzvlü ağdır, mürәkkәb qalxanvarı, yaxud süpürgә çiçәk qrupunda yerlәşir. Meyvәlәri almayabәnzәr, xırda, adәtәn qırmızıdır. Əsasәn, Şәrqi Asiyada 60 növü var. F.-nın növlәri dekorativ bitki kimi becәrilir; kütlәvi çiçәklәmә vә meyvәvermә vaxtı xüsusilә effektli olurlar. Qafqazın vә Krımın Qara dәniz sahillәrindә, dişli F. (Ph. serrulata), çılpaq F. (Ph. glabra) vә s. becәrilir. Azәrb.-da yeganә növü dişli F. Abşeron, Kür-Araz ovalığı, Lәnkәran ovalığı, Zaqatala-Balakәn massivinın dağәtәyi zolağında becәrilir. İsti vә işıqsevәn, torpağa az tәlәbkar bitkidir. Toxumla, calaqla vә qәlәmlә çoxaldılır. Yaşıllaşdırmada istifadә edilir. Vәtәni Çindir.

 Dişli fotiniya (Photinia serrulata).