FOTOELEKTROKİMYA – yaxın UB, görünәn vә ya yaxın İQ işığın elektrokimyәvi sistemlәrlә qarşılıqlı tәsiri nәticәsindә baş verәn proseslәri öyrәnәn elm bölmәsi. F. dar mәnada elektrod – elektrolit sistemindә işıq vә elektrik enerjisinin qarşılıqlı çevrilmә proseslәrini öyrәnir.

Elektrokimyәvi sistemin işıqlandırılması zamanı elektrokimyәvi potensialın yaranması aşağdakı proseslәrlә şәrtlәnir: elektrolitdә vә ya elektrodlarda gedәn fotokimyәvi reaksiyalar; yarımkeçirici elektrodlarda qeyri-tarazlıq elektronların vә deşiklәrin generasiyası; elektronların elektroddan elektrolit mәhluluna fotoemissiyası; adsorbat vә elektrod arasında yükün daşınması ilә elektrod üzәrindә adsorbsiya olunmuş hissәciklәrin (ion, molekul) fotodesorbsiyası. Əks hadisә, yәni özәkdәn elektrik cәrәyanı buraxılan zaman işıqburaxma elektroxemilüminessensiyanın, elektrod vә elektrolit arasındakı başlıqda qaz boşalmasının tәbiәtinә vә s. malik ola bilәr. Yarımkeçiricilәr F.-sının inkişafının әsas istiqamәtlәrindәn biri işıq enerjisini kimyәvi vә ya elektrik enerjisinә çevirmәyә imkan verәn fotoelektrokimyәvi özәklәrin (FÖ) işlәnib hazırlanmasıdır. Belә özәyin iki elektrodundan heç olmasa biri işığahәssas yarımkeçiricidir. Sonuncuda işıqlandırılma zamanı elektrik potensialı yaranır; bu yarımkeçiricidә daxili fotoeffekt vә ya elektronların injeksiyası yolu ilә enerjinin fotohәyәcanlaşmış boyadan (sensiblizatordan) yarımkeçiriciyә ötürülmәsi hesabına baş verir. Son variant elektrik cәrәyanını tsiklik prosesdә istehsal edәn Qretsel özәyi adlanan FÖ-dә hәyata keçirilir.

F.-nın elmi nәticәlәri hidrogenin sulu mәhlullardan ayrılma vә suyun çirklәndiricilәrdәn tәmizlәnmәsi texnologiyalarının işlәnib hazırlanmasında, yanacaq elementlәrinin yaradılmasında vә s. tәtbiq oluna bilәr.