FOTOELEKTRON SPEKTROSKOPİYASI – maddәnin quruluşunun öyrәnilmәsi metodu; fotoelektron emissiyası zamanı uçub çıxan elektronların energetik spektrlәrinin ölçülmәsinә әsaslanır. Eynşteynin qanununa görә uçub çıxan elektronun әlaqә enerjisinin (çıxış işi) vә onun kinetik enerjisinin cәmi düşәn fotonun hν enerjisinә bәrabәrdir (h – Plank sabiti, ν – düşәn şüanın tezliyidir). Elektronların energetik spektrini ölçmәklә, onların әlaqә enerjisini vә enerji sәviyyәsini tәdqiq olunan maddәdә tәyin etmәk olar.

F.s.-nda fotonlarının enerjisi 10⁴ – 10 eV-a (yәni ~10^–2 –10 nm dalğa uzunluqlu şüaya uyğun gәlәn) bәrabәr olan monoxromatik rentgen vә ya UB şüadan istifadә olunur. Fotoelektronların spektri yüksәk ayırdetmә qabiliyyәtinә malik (әldә olunan ayırdetmә qabiliyyәti rentgen oblastında ~10^–1 eV, UB oblastda ~10^–2 eV-dur) elektron spektrometrlәrinin kömәyi ilә tәdqiq edilir.

F.s. metodu qaz, maye vә bәrk halda olan maddәlәrә tәtbiq olunur vә bәrk cisimdә elektronların enerji sәviyyәlәrini (o cümlәdәn keçiricilik zonasında elektronların paylanmasını), atom vә molekulların xarici vә daxili elektron örtüklәrini tәdqiq etmәyә imkan verir.