FRANK (Franck) Ceyms (26.8.1882, Hamburq – 21.5.1964, Höttingen) – alman vә Amerika fiziki. Nobel mükafatı laureatı (1925, Q.L.Herts ilә birgә ). SSRİ EA әcnәbi üzvü (1927), London Kral Cәmiyyәtinin әcnәbi üzvü (1964). Heydelberq vә Berlin un-tlәrini bitirmişdir (fәlsәfә doktoru, 1906). 1906–18 illәrdә Berlin Un-tindә (1916 ildәn prof.), 1918–20 illәrdә kayzer Vilhelm cәmiyyәtinin Fiziki Kimya İn-tunda işlәmişdir. Höttingen Un-tindәki Fizika İn-tunun prof.-u vә direktoru (1920–33), Baltimordakı C.Hopkins Un-tinin (1935–38), Çikaqo Un-tinin (1938 ildәn) prof.-u olmuşdur. Hg atomunun hәyәcanlanmasını (bax Frank–Herts tәcrübәsi), elektronların vә atomların molekullarla toqquşmasını tәdqiq etmiş, molekuldaxili qüvvәlәrlә molekulun spektri arasındakı asılılığı izah etmiş, Frank–Kondon prinsipini (molekullarda elektron keçidi zamanı atomların nisbi vәziyyәtinin vә sürәtinin saxlanması) vermişdir. F.-ın fotosintezә dә aid işlәri var. 1945 ildә atom bombasından istifadә olunması әleyhinә çıxmışdır.