FRANK İlya Mixayloviç [10(23).10.1908, S.-Peterburq – 22.6.1990, Moskva] – rus fiziki. SSRİ EA akad. (1968; m.üzvü 1946). SSRİ Dövlәt mükafatı laureatı (1946, 1953, 1971), Nobel mükafatı laureatı (1958, İ.Y.Tamm vә P.A.Çerenkov ilә birgә). Moskva Dövlәt Un-tini (MDU) bitirmişdir (1930). Dövlәt Optika İn-tunda (1930–34),SSRİ EA Fizika İn-tunda (1934–70) işlәmişdir. Birlәşmiş Nüvә Tәdqiqatları İn-tunun Neytron fizikası laboratoriyasının (indi F.adını daşıyır) tәşkilatçısı vә birinci direktoru (1957–88). 1971–90 illәrdә SSRİ EA Nüvә Tәdqiqatları İn-tunda çalışmışdır. MDU-nun prof.-u (1940 ildәn). Tәdqiqatları fiziki optikaya vә nüvә fizikasına aiddir. Çerenkov–Vavilov şüalanmasını izah etmiş (İ.Y.Tammla birlikdә), sındırıcı mühitdә Dopler hadisәsinin nәzәriyyәsini inkişaf etdirmiş, γ-kvantların elektron-pozitron cütü yaratmasını (L.V.Qroşevlә birlikdә), heterogen uran-qrafit sistemlәrindә neytronların yayılmasını vә artmasını tәdqiq etmişdir. Neytronların yayılmasını öyrәnmәk üçün impuls üsulunu işlәyib hazırlamış vә neytronların diffuzion soyumasını kәşf etmişdir. F.-ın rәhbәrliyi altında sürәtli neytronlarla işlәyәn impuls reaktoru qurulmuş vә işә salınmışdır (1960). SSRİ EA S.İ.Vavilov ad. qızıl medalla (1979), 3 dәfә Lenin ordeni ilә tәltif olunmuşdur (1952, 1953, 1975).