FRÁNKFORT Henri (24.2.1897, Amsterdam – 16.7.1954, London) – Niderland arxeoloqu, misirşünas vә şәrqşünas, Niderland Kral EA-nın üzvü (1950). Amsterdam Un-tindә, London Un-tinin kollecindә (U.M.Pitrinin yanında) tәhsil almışdır. 1924–25 illәrdә Afinada Britaniya Arxeologiya Mәktәbindә tәcrübә keçmiş, 1927 il- dә Leyden Un-tindә dissertasiya müdafiә etmişdir. 1925–29 illәrdә Misirdә [Amarna, Abidos (o cümlәdәn I Setinin kenotafı – “Osireyon”), Armant], 1929–37 illәrdә [C.H.Brestedin (ABŞ) dәvәti ilә] İraqda [Eşnunna (o cümlәdәn arxivlәri olan mәbәdlәr, çar sarayı), Tutub (o cümlәdәn Cәmdәt-Nәsr dövrünә aid Sin mәbәdi, “oval” mәbәd; tapıntılar arasında çox sayda heykәllәr, möhürlәr var)] qazıntılar aparmışdır. 1932 ildәn Çikaqo Şәrq İn-tunun prof.-u vә Şәrq dillәri vә әdәbiyyatı şöbәsinin müdiri; Amsterdam Un-tinin prof.-u olmuşdur. 1949 ildәn London Un-tinin kollec prof.-u vә Varburq İn-tunun direktoru idi. Əsәrlәri Qәdim Şәrq arxeologiyası, sfragistikası, memarlığı, heykәltәraşlığı vә dünyagörüşünә hәsr olunmuşdur. Qәdim Misir vә Mesopotamiya mәdәniyyәtlәrinin müqayisәli öyrәnilmәsinә dair tәdqiqatları mühüm әhәmiyyәt kәsb edir.

Ə s ә r l ә r i: Studies in early pottery of the Near East. L., 1924–1927. Vol. 1–2; Cylinder seals. L.,1939; Before philosophy. Harmondsworth, 1949; The birth of civilization in the Near East. Harmondsworth, 1951; The art and architecture of the Ancient Orient. Harmondsworth, 1954.