FRANK–HERTS TƏCRÜBƏSİ – atomların diskret enerji sәviyyәlәrinә malik olmasını sübut edәn tәcrübә. İlk dәfә C.Frank vә H.Herts aparmışlar (1913). N.Borun atomun kvant nәzәriyyәsinin eksperimental tәsdiq olunmasında mühüm rol oynamışdır.

Tәcrübәdә I cәrәyan şiddәtinin K katodu ilә Cı toru arasındakı güclәndirici potensialdan asılılığı tәdqiq edilmişdir; C₂ toru vә A anodu arasına yavaşıdıcı potensial qoyulmuşdur. I oblastda sürәtlәnәn elektronlar torlar arasındakı II oblasta düşür vә L borucuğunu dolduran civә buxarının atomları ilә toqquşur (şәkil).

Toqquşmadan sonra III oblastdakı yavaşıdıcı potensialı aşmaq üçün enerjisi kifayәt edәn elektronlar anoda düşür. Sürәtlәndirici potensialın 4,9 V-a qәdәr artması zamanı cәrәyan şiddәti monoton artır. Demәli, ℇ ≲ 4,9 eV enerjilәrdә elektronların atomlarla toqquşması elastikidir vә atomların daxili enerjisini dәyişmir. Elektronların enerjisi ℇ ≳ 4,9 eV olduqda onların atomlarla toqquşması qeyri-elastik olur, elektronların enerjisi atomların daxili enerjisinә keçir. 4,9 eV enerjinin misillәrindә (9,8 eV, 14,7 eV) elektronlar hәr dәfә atoma 4,9 eV verәrәk bir neçә dәfә qeyri-elastik toqquşmaya uğraya bilәr. Belәliklә dә, F.–H.t. göstәrir ki, 4,9 eV enerjinin mümkün olan әn kiçik porsiyasıdır vә civә atomu әsas energetik halda onu uda bilәr.