FRANSA ELMLƏR AKADEMİYASI (Académie des sciences) – dünyada ilk elmlәr akademiyalarından biri. Əsası 1666 ildә XIV Lüdovik tәrәfindәn Parisdә J.B.Kolberin tәklifi ilә qoyulmuşdur (1793 ilә qәdәr Kral EA). Qeyri-rәsmi olaraq Paris EA kimi tanınır. Fransa İnstitutuna daxildir. Üzvlәri ömürlük seçilir. İlk vaxtlar 130 üzvü, 50 xarici üzvü, 160 müxbiri vә 2 daimi katibi olmuşdur. İlk üzvlәri arasında X.Huygens, C.D.Kassini, O.Römer, J. de Roberval vә E.Mariott olmuşlar. 1699 ildә reqlamentә әsasәn E.A-na kralın razılığı ilә seçilәn 4 sinif akademiklәr – fәxri üzvlәr, pansionerlәr, assosiativlәr vә adyunktlar daxil idi. Fәxri akademiklәr tanınmış riyaziyyatçı vә ya fiziklәr arasından seçilir, onlardan biri prezident tәyin olunurdu. Pansionerlәr mütlәq şәkildә Parisdә yaşamalı idilәr; onların sırasına hәndәsәşünaslar (riyaziyyatçılar), astronomlar, mexaniklәr, anatomlar, kimyaçılar vә botaniklәr (hәr ixtisas üzrә 3 üzv), katib vә xәzinәdar daxil idi. Hәmin ixtisasları (hәr birini 2 üzv) 12 assosiativ akademik tәmsil edirdi, 8 yer xarici üzvlәr üçün nәzәrdә tutulurdu. Adyunktların elmi ixtisaslaşması onların tәhkim olunduqları akademik-pansionerlәrin ixtisaslarına uyğun gәlmәli idi. Akademiyada A.M.Amperin, J.B.Dümanın, A.Lavuazyenin, P.L.Mopertüinin, R.A.Reomürün vә müasir alimlәrin (E.Borel, L. de Broyl, A.Veyl vә b.) arxivlәri qorunub saxlanır. 80-ә yaxın mükafat, o cümlәdәn elmin inkişafına mühüm töhfәyә görә Qrand-medal (1997 ildәn), xeyirxahlıq vә tәrbiyәvi әsәrlәrә görә Montion mükafatı [(1784 ildәn; baron A.J.B. de Montion (1733–1820) tәsis etmişdir] verilir.
Fransa Elmlәr Akademiyasının binası. Paris.
