FREONLAR, s o y u d u c u l a r – soyuducu maşınlarda soyuducu agent kimi istifadә edilәn flüortәrkibli doymuş karbohidrogenlәr (әsasәn, metan vә etanın törәmәlәri). F.-ın molekullarında flüor atomundan başqa, adәtәn, xlor atomları, nadir hallarda brom olur. 40-dan çox müxtәlif F. mәlumdur, onların әksәriyyәti sәnayedә istehsal edilir.

F. rәngsiz, iysiz qaz vә ya mayelәrdir; üzvi hәlledicilәrdә yaxşı, suda çox pis hәll olur. Diflüordixlormetan CF₂Cl₂, flüor-trixlormetan CFCl₃ diflüorxlormetan CHF₂Cl daha çox yayılmışdır: onların qaynama temp-rları müvafiq olaraq –29,8, –23,8 vә – 40,8°C. F. yanmır vә açıq alovla tәmasda olduqda belә partlamır, turşu vә oksidlәşdiricilәrin tәsirinә kimyәvi davamlıdır; 200°C-dәn yuxarı qızdırıldıqda parçalanaraq çox zәhәrli mәhsullar (perflüor-izobatilen C₄F₈, flüorfosgen CF₂O vә s.) әmәlә gәtirir; xlor- vә bromtәrkibli F. qızdırıldıqda maqnezium, onun әrintilәri vә bürünc ilә, hidrogentәrkibli F. qәlәvilәrlә qarşılıqlı tәsirdә olur. F., adәtәn, flüorlaşdırıcı agentlәrin müvafiq polixlor karbohidrogenlәrlә reaksiyasından, hәmçinin hidrogen-flüorid vә xlorun parafin vә olefinlәrlә birgә tәsirindәn alınır.

F. müxtәlif tip soyuducu texnikasında istifadә edilmәklә yanaşı, kosmetika, dәrman vasitәlәri vә boyaların aerozol şәklindә qablaşdırılmasında uçucu komponent kimi, qaz halında dielektrik, alovsöndürücü qarışıq, bәzi flüor-üzvi birlәşmәlәrin alınmasında xammal kimi vә s. geniş tәtbiq edilir.

F., bir qayda olaraq, biol. aktivliyi aşağı olan az zәhәrli birlәşmәlәrdir.