FREYDİZM – 1) dar mәnada – Z.Freyd tәrәfindәn әsası qoyulmuş vә işlәnib hazırlanmış dәrin psixologiya cәrәyanı; Freydin ilkin psixoterapevtik konsepsiyalarından ayrılan fәrdi psixologiyadan (A.Adler), analitik psixologiyadan (K.Yunq) vә s.-dәn fәrqli olan klassik psixoanaliz. 20 әsrin birinci yarısında klassik psixoanalizi ilk növbәdә Freydin tәlәbәlәri vә әmәkdaşları (K.Abraham, O.Fenixel, T.Rayk vә s.) tәmsil edirdi. 20 әsrin ikinci yarısında J.Lakan “Geriyә Freydә doğru” – Freydin autentik şәrhinә qayıtmaq çağırışı ilә çıxış edirdi.

2) Geniş mәnada – Z.Freydin ideyalarından qaynaqlanan müxtәlif psixoterapevtik vә psixoloji konsepsiya vә cәrәyanların: V.Reyx vә H.Markuzenin freydomarksizmi, A.Freyd vә H.Hartmanın eqo-psixologiyası, M.Klyaynın uşaq psixoanalizi vә obyekt münasibәtlәri nәzәriyyәsi, K.Horni, E.Fromm, H.Sallivan vә E.Eriksonun neofreydizmi, F.Aleksanderin psixosomatikası, T.Frençin (ABŞ) psixoanalizin neobihevioristik interpretasiyası vә s-nin ümumi adı.

Freydin ideyaları vә metodoloji yanaşmalarından bu vә digәr dәrәcәdә tәsirlәnmә müxtәlif humanitar fәnlәr vә fәlsәfi cәrәyanlarda, o cümlәdәn amerikan mәdәni antropologiyasında (M.Mid vә R.Benedikt, B.Malinovski), neomarksizmdә (Frankfurt mәktәbi, L.Altüsser, F.Ceymison), ekzistensial fәlsәfәdә (J.P.Sartr), fenomenologiyada (M.Merlo-Ponti), strukturalizmdә (K.Levi-Stros), dekonstruktivizmdә (J.Derrida), hermenevtikada (P.Rikör, A.Lorenser), әdәbiyyatşünaslıqda psixoanalitik tәnqiddә özünü göstәrir.