FRİŞ Karl (Karl fon Frisch) (20.11.1886, Vyana – 12.6.1982, Münxen) – Avstriya etoloqu, Fiziologiya vә tibb üzrә Nobel mükafatı laureatı (1973, Konrad Lorents vә Nikolas Tinbergenlә birlikdә). Vyana Un-tinin әvvәlcә tibb, sonra isә fәlsәfә fakültәsini bitirmiş vә zoologiyanı öyrәnmәyә başlamışdır. 1910 ildә doktorluq dissertasiyası müdafiә etmiş vә Münxen Un-tindә assistent işlәmişdir. F. 1921 ildә Rostok Un-tindә zoologiya fakültәsinin dekanı olmuş, 1923 ildә Breslauya köçmüş, 1925 ildә Münxenә qayıtmış, 1946 ildә Zoologiya İn-tu bağlandığına görә Qradsa köçür vә 4 ildәn sonra yenidәn bәrpa olunmuş Zoologiya İn-tuna qayıdır. 1958 ildә F. әmәkdar prof. olmasına baxmayaraq, elmi fәaliyyәtini davam etdirir. F. arıların hissiyyatını öyrәnmәk üzrә ixtisaslaşmış, onların ünsiyyәt mexanizmini müәyyәnlәşdirmiş, ultrabәnövşәyi vә polyarlaşmış işığa hәssaslığını göstәrmişdir. Onun tәdqiqatlarının әsasını bal arısının sensor hissiyatının öyrәnilmәsi tәşkil edir; o, bal arılarının qarınbulama rәqslәrinin әhәmiyyәtini izah edәn ilk alimlәrdәn biridir. Bu nәzәriyyә o vaxtlar skeptisizm ilә qarşılandı vә digәr alimlәrin mübahisәlәrinә sәbәb oldu. Yalnız illәr keçәndәn sonra, F.-in versiyasının (variantının) düzgünlüyü qәti surәtdә sübuta yetirildi.