FRİZ DİLİ - frizlərin dili. . Niderlandda Frislandiya әyalәtindә (kontinental hissәsi vә Tershellinq vә Shirmonnikoqun adaları), o cümlәdәn Almaniyada Aşağı Saksoniya federal әrazisinin Zaterland icmasında vә Şlezviq-Holşteyn federal әrazisinin şm.-q.-indә yayılmışdır. Bu dildә danışanların sayı Frislandiyada 350 mindәn 453 min nәfәrә, Zaterlandda 1 mindәn 2,5 min nәfәrә, Şlezviq-Holşteyndә 8 mindәn 10 min nәfәrә qәdәrdir.

F.d. german dillәrinin q. qrupuna aiddir vә daha çox ingilis dilinә yaxındır. 3 regional variantı mövcuddur: qәrbi friz (Frislandiya), şәrqi friz (Zaterland), şimali friz (Şlezviq-Holşteyn). Dialektlәrarası fәrqlәr, әsasәn, fonetika sahәsindәdir. Onlar qәrbi friz dialektlәrindә daha az әks olunmuşdur. Qәrbi vә şimali friz dialektlәri yerli dil statusuna malikdir vә rәsmi ünsiyyәtdә işlәdilmәsinә icazә verilir.

F.d.-nin qrammatikası Niderland dilinin qrammatikasından az fәrqlәnir. F.d. nominativ quruluşlu dildir. Söz sırası alman vә Niderland dillәrindәki kimidir. Qәrbi friz dilindә Niderland dilindәn, şәrqi vә şimali friz dillәrindә aşağı vә yuxarı alman dialektlәrindәn, şimali friz dilindә hәmçinin Danimarka dilindәn alınma sözlәr var.

Qәrbi vә şәrqi friz regionlarından ilk yazılı abidәlәr 13 әsrә aiddir. Bu günә qәdәr dә xeyli variativliyi ilә seçilәn qәrbi friz dili 17 әsrdә әdәbi dil normasının әsası olmuşdur.

Yazısı üst diakritik işarәlәrin istifadәsi ilә latın qrafikası әsasındadır; orfoqrafiya standartı yalnız qәrbi friz dili üçün işlәnib hazırlanmışdır (1878), yazı qaydaları 1980 ildә qәbul edilmişdir.

F.d., әsasәn, şifahi ünsiyyәt vasitәsidir. Tәhsil sahәsindә (F.d.-nin fakültativ tәdrisi ibtidai mәktәblәr vә gimnaziyalarda, peşәkar öyrәnilmәsi ali mәktәblәrdә hәyata keçirilir), yerli idarәçilik, ibadәt vә KİV-dә dә istifadә edilir. F.d.-ndә bәdii әdәbiyyat nәşr olunur.