FRONTİT (lat. frons, frontis – alın) – alın cibinin iltihabı. F. birtәrәfli, yaxud ikitәrәfli olur vә burunun digәr әlavә ciblәrinin iltihabı ilә müşayiәt edilә bilәr. Kәskin zökәmin, qripin, qızılcanın, skarlatinanın vә digәr infeksion xәstәliklәrin ağırlaşması kimi baş verir. Ə l a m ә t l ә r i: başağrısı, alın cibinin divarı nahiyәsindә kәskin ağrı (xüsusәn sәhәrlәr), xәstә cib tәrәfdә burun tәnәffüsünün vә ifrazatının pozulması. Ağrı çox vaxt dözülmәz olur. Ağır hallarda gözlәrdә ağrı, işıqdanqorxma vә iybilmә qabiliyyәtinin azalması qeyd olunur. Alın cibi irindәn azad olduqdan sonra başağrısı zәiflәyir vә ifrazolunma çәtinlәşdikcә bәrpa olunur. Kәskin qrippoz F. zamanı bәdәn temp-ru yüksәlir, bәzәn zәdәlәnmiş alın cibi üzәrindә dәri örtüyünün rәngi dәyişir, alın vә yuxarı göz qapağı nahiyәsindә şişkinlik olur. F.-dә әsas müayinә üsulu alın ciblәrinin rentgenoqrafiyası vә diafanoskopiyadır.

M ü a l i c ә s i: kәskin F. zamanı konservativ üsulladır. Alın cibindәn ayrılan ifrazatın axması üçün orta burun keçәcәyinin selikli qişasına naftizin mәhlulu vә ya 0,2%-li qlazolin mәhlulu sürtülür. Bu mәhlullardan buruna damcı kimi dә işlәdilir. Xәstәliyin ilk günlәrindә yataq rejimi, aspirin qәbulu, antibiotik aerozolu ilә inhalyasiya, fizioterapiya (göy işıq lampası ilә qızdırmaq, solyuks, UYT-terapiya) tәtbiqi lazımdır. Ağır hallarda antibiotiklәrdәn әzәlәdaxili istifadә olunması göstәrilmişdir. Xroniki F. zamanı konservativ üsullarla müalicәyә başlanılır, nәticә vermәdikdә cәrrahi müalicә üsulu tәtbiq edilir.