FRYAZİNO – RF-nin Moskva vil.-ndә şәhәr. Əh. 59,8 min (2016). Lyuboseyevka çayı sahilindәdir. D.y. st. Şyolkovo – Fryanovo avtomobil yolu F.-dan keçir.

Adı, ehtimal ki, Kremlin tikintisindә iştirak edәn fryazlarla (f r y a z i n l ә r; Rusiyada yaşayan italyanlar) әlaqәdardır; ilk dәfә 1584–86 illәrә aid Moskva qәzasının müfәssәl dәftәrindә kәnd kimi qeyd edilir. 1938 ildәn fәhlә qәsәbәsi olmuş, 1951 ildә şәhәr statusunu almışdır. 2003 ildә şәhәrә
“naukoqrad” (“elm şәhәri”) statusu verilmişdir.

F. radioelektron sәnayesi mәrkәzlәrindәn biridir. Şәhәrdә “Qastroskan” ticarәt markası altında tibbi avadanlıq (“İstok-Sistema”), eşitmә aparatları (“İstok-Audio”) vә işıq-diod işıqlandırma cihazları (“Fokus”) istehsal edilir. Böyük gücә malik lifli lazerlәr sәnayesindә dünya lideri olan “IPG Photonics” beynәlxalq korporasiyasının üç әsas istehsalat meydançalarından biri olan “İRE-Polyus” elmi-texniki birlik F.-da yerlәşir. İqtisadiyyatının müxtәlif sahәlәrindә tәqr. 400 müәssisә fәaliyyәt göstәrir.