FUMİQANTLAR (lat. fumigans; yiyәlik halda fumigantis – tüstülәyәn, tüstüyә verәn) – bitki zәrәrvericilәri vә bitki xәstәliklәrinin törәdicilәri ilә mübarizәdә istifadә olunan pestisidlәr. Onları qaz halında fumiqasiya üsulu ilә әsasәn, zәhәrli buxarlar, qazlar, tüstü, aerozollarla işlәnmәdә tәtbiq edirlәr. Fumiqasiya tikililәrin vә ya işlәnәn mәhsulların tәmiz hava axınından tam izolyasiyası ilә keçirilir. F.-ın istifadә müddәti vә üsulları onların xassәlәrindәn, o cümlәdәn fumiqasiya obyektinin zәrәrvericilәr vә xәstәliklәrlә yoluxma xüsusiyyәtlәri vә dәrәcәsindәn asılıdır. F. kimi әsasәn, bu maddәlәr tәtbiq edilir: fosfin (alüminium vә ya maqnezium fosfidin hidrolizindәn alınır), metilbromid, kükürd (kükürddioksidi verәn tüstü şaşkaları). F. xәstәlik törәdicilәri, ehtiyatlara zәrәr verәn cücülәr vә gәnәlәrlә mübarizәdә, hәmçinin karantin zәrәvericilәrinә qarşı istifadә olunur. F.-ın istifadәsi zamanı preparatın tәtbiq normasından asılı olaraq ekspozisiya vә deqazasiya vaxtları seçilir.

F.-la anbar, oranjereya, istixanalar, elevatorlar, dәyirmanlar, nәqliyyat vasitәlәri, tara, bitki mәhsulları (dәn, meyvә, tәrәvәz, әkin materialı) vegetasiya olunan bitkilәr (üzüm vә çay kolları, meyvә vә sitrus ağacları), torpaq vә gәmirici yuvaları tәmizlәnir. Tam havalandırmadan sonra iş zonası havasının tәrkibindә pestisid qalıqlarının konsentrasiyasının icazә verilәn son hәddindәn çox olmadıqda insanların oraya buraxılmasına, mәhsulların reallaşdırılmasına isә pestisid qalığının icazә verilәn maksimal hәddәn çox olmadıqda yol verilir. Yüksәk tәhlükәli pestisidlәr olan F.-la iş zamanı әleyhqazlardan istifadә olunur.