FURAN QATRANLARI - tәrkibindә furan tsikli saxlayan birlәşmәlәrin polikondenslәşmә, yaxud ion polimerlәşmәsindәn alınan termoreaktiv oliqomer vә ya polimer mәhsullar. Əsasәn, furfuroldan, furfuril spirtindәn (onunoliqo merlәri hәmçinin furil qatranları adlanır), furfurilfurfuraldan, furfurolun asetonla kondenslәşmә mәhsullarından alınır. Qatranların әmәlәgәlmәsi vә bәrkimәsi ilә nәticәlәnәn reaksiyaların mexanizmi vә getmә dәrinliyi, elәcәdә onların müxtәlif alınma mәrhәlәlәrindәki quruluşu vә xassәlәri ilkin komponentlәrin nisbәti vә tipindәn, katalizatorun miqdarı vә tәbiәtindәn, reaksiyanın getmә şәraitindәn asılıdır.

F.q. asetonda hәllolan, tünd rәngli bәrk amorf vә ya maye maddәlәrdir; zәhәrlidirlәr. F.q.-nın bәrkimә mәhsulları sәrt, kövrәk, termiki (300°C-ә qәdәr), radiasiya vә kimyәvi tәsirlәrә qarşı davamlı torvarı polimerlәrdir; bunların karbonlaşmasından qrafitlәşmәyәn karbon materialları әmәlә gәtirmәklә yüksәk çıxımla (60–80%) koks alınır. F.q. vә onların modifikasiyaları polimer betonlar, korroziyaya- vә odadavamlı yaxılar, lifli laylı şüşә-, kömür- vә asboplastiklәr, ağacyonqarlı vә ağaclifli tavalar üçün bәrkiyәn bağlayıcı kimi, karbonşüşә, karbon-karbon kompozisiya materiallarının istehsalında vә s. istifadә olunur.