FÜMAN (Fühmann) Frans [15.1.1922, indiki Çexiya, Rokitnitse – 8.7.1984, Almaniya Demokratik Respublikası, (ADR) Şәrqi Berlin] – alman yazıçısı. ADR İncәsәnәt Akademiyasının üzvü (1961). Aptekçi ailәsindә doğulmuşdur. Sistemli tәhsil almamışdır. 1941 ildә Vermaxt ordusuna çağırılmış, Yunanıstanda vә SSRİ әrazisindә gedәn döyüşlәrdә iştirak etmişdir; 1945 ildә sovet qoşunları tәrәfindәn әsir götürülmüşdür. 1949 ildә ADR-ә repatriasiya olunmuşdur; Şәrqi Berlindә yaşamış, jurnalist kimi fәaliyyәt göstәrmişdir. Ədәbi debütü “Stalinqrada sәfәr” (1953) poeması ilә olmuşdur. “Alay dostları” (1955), “Barlax Güstrovda” (1963) vә s. povestlәri, “Yәhudi avtomobili” (1962), “Çar Edip” (1966), “Dionisinin qulağı” (1985) hekayә vә povest topluları var. Yüksәk insanpәrvәrlik ruhu, faşizmin faciәsini dәrk etmәyә çağırış F. yaradıcılığının әsas xüsusiyyәtlәridir. “İyirmi iki gün, yaxud ömrün yarısı” (1976) adlı xatirәlәr kitabının, uşaqlar üçün әsәrlәrin, oçerklәrin, reportajların, esse vә tәrcümәlәrin müәllifidir. Bir sıra әsәri ekranlaşdırılmışdır.

Ə s ә r l ә r i: Избранное. М., 1973.

Əd.: R i c h t e r H. F.Fühmann, ein deutsches Dichterleben. B., 1992.