GELLERUP Karl Adolf (2.6.1857, Danimarka – 13.10.1919 Drezden, Almaniya) – Danimarka şairi, yazıçı vә dramaturq. Nobel mükafatı laureatı (1917). Bәzi әsәrlәrini “Epiqonos” tәxәllüsü ilә çap etdirmişdir. Keşiş ailәsindә doğulmuşdur. Kopenhagen Un-tinin ilahiyyat fakültәsini bitirmişdir (1878). İlk çap әsәri “İdealist” (1878) romanı olmuşdur. Avtobioqrafik sәciyyәli “Almanların tәlәbәsi” (1882) romanında G. öz timsalında dini inancla bağlı böhran yaşayan gәncin hәyatını tәsvir etmişdir. “Brunxid” mәnzum dramı (1884) vә “Tamir” (1886) poeması ona әdәbi şöhrәt qazandırmışdır. 19 әsrin  90-cı illәrindә G. yunan faciәsi әnәnәlәrindәn uzaqlaşaraq, mövcud reallıqlarа әsaslanan mövzulara müraciәt etmişdir. Mәhәbbәt vә sevgililәrin faciәsindәn bәhs edәn “German Bandel” (1891), “Vutorn” (1893), hökumәt mәmurlarının riyakarlığını ifşa edәn “Əlahәzrәt” (1895) povestlәri müәllifin uğurlu realist әsәrlәri sırasına daxildir. “Keşiş Mors” (1894), “Dәyirman” (1896), “Kamanitanın zәvvarlığı” (1906), “Əbәdi sәyyahlar” (1910) vә s. romanların müәllifidir.