GENOTİP – orqanizmin irsәn aldığı bütün genlәrin (onların allellәri dә daxil olmaqla) mәcmusu.

G. dar mәnada müәyyәn orqanizmin tәhlil olunan әlamәtinә nәzarәt edәn (bu halda G.-in baxılmamış hissәsi genotip mühiti olur) gen allellәrinin, yaxud qruplarının mәcmusudur. “G.” termini 1909 ildә V.İohansen tәrәfindәn tәklif edilmişdir. Müasir genetikada G. bir-birindәn asılı olmayan genlәrin mexaniki yığımı yox, müxtәlif sәviyyәlәrdә qarşılıqlı tәsirdә olan genetik elementlәrin vahid sistemidir. G. orqanizmin inkişafına, quruluşuna vә hәyat fәaliyyәtinә yәni orqanizmin bütün әlamәtlәrinin cәmi olan fenotipә nәzarәt edir. Müxtәlif G.-li orqanizmlәr eyni fenotipli ola bilәr, buna görә dә orqanizmin G.-ini tәyin etmәk üçün onun genetik analizini, mәs., analizedici çarpazlaşdırma aparmaq lazımdır. Eyni G.-li fәrdlәr müxtәlif şәraitdә olduqda bir-birindәn әlamәtlәrin tәzahür xarakterinә görә, yәni fenotipә görә fәrqlәnә bilәr. Belәliklә, G. orqanizmin vә onun ayrı-ayrı әlamәtlәrinin xarici mühitlә qarşılıqlı tәsiri vәziyyәtindә mümkün ola bilәn inkişaf yollarını müәyyәn edir. Mühitin fenotipik әlamәtlәrә tәsirinә misal Himalay xәttindәn olan adadovşanlarında xәz rәnginin dәyişmәsini göstәrmәk olar; eyni G.-dәn olan adadovşanları soyuqda yetişdirildikdә xәzi qara, mülayim temp.-da, Himalay rәngi (üzü, qulağı. pәncәlәri vә quyruğu qara olan ağ rәngli fәrdlәr), yüksәk temp.-da ağ xәzli olurlar. G.-in dәyişilmәsi vә müxtәlif G.-li fәrdlәrin olması tәkamül prosesinin şәrtlәrindәn biri olan genotipik dәyişkәnlikdәn xәbәr verir. Eyni G.-li fәrdlәrin olması qeyri-cinsi (vegetativ çoxalma daxil olmaqla) yolla çoxalan tәmiz xәtlәr üçün dә sәciyyәvidir. Bir mayalanmış yumurtahüceyrәdәn inkişaf edәn oxşar әkizlәr eyni G.-ә malikdir.