GEORGİ AMARTOL, Georgi Monax (Γεώργιος Μοναχος, Άμαρτωλός – hәrfi mәnada “Günahkar”) – 9 әsr (867 ildә ölmüşdür). Bizans salnamәçisi, Adәmdәn 843 ilәdәk olan dövrә aid “Müxtәsәr salnamә”nin müәllifi. G.A.-un әsәri 2 әsas redaksiyada saxlanmışdır: biri – “vulqata” (30-dan çox yunan әlyazması), digәri isә nәşr edilmәmiş yeganә (11 әsr) yunan әlyazması (Parisdә, Fransanın Milli Kitabxanasında saxlanılır). 

Salnamәnin tәrtibindә G.A. çoxlu tarixi, agioqrafik, dini vә apokrifik әsәrlәrdәn istifadә etmişdi. Tarixi materialları Bibliya ilә yanaşı, İosif Flavinin, 5 әsr kilsә tarixçilәrinin, İoann Malalanın, Tövbәkar Feofanın әsәrlәrindәn, hәmçinin bizә gәlib çatmamış mәnbәlәrdәn götürmüşdü. G.A. hәmin materialları öz әsәrindә sәrbәst şәkildә yerlәşdirәrәk iqtibasları sözbәsöz tәkrarlayır, orijinalın nәqli cümlәlәrini dәyişdirmir, bununla yanaşı tarixi mәlumatlardan daha çox nәsihәt xarakterli mәlumatlaraı diqqәt mәrkәzindә saxlayır. G.A.-un salnamәsi pravoslav oxucuların bir sıra nәsillәri üçün ümumi tarixә dair mәlumatların әsas mәnbәyi olmuşdur.