GEORQ, Georgios (Gεώργιος) – Yunanıstan krallarının adı.

I G e o r q (24.12.1845, Kopenhagen – 18.3.1913, Saloniki) – Şlezviq-Holşteyn-Zonderburq-Qlüksburq sülalәsindәn Yunanıstan kralı [1863–1913] (taxta çıxmazdan öncә şahzadә Vilhelm). Yunanıstan kralı II Georqun babasıdır. Yunanıstan kralı I Ottonun [1832–67] devrilmәsindәn sonra 1862 ildә B. Britaniya, Fransa vә Rusiya hökumәtlәrinin tövsiyәsi ilә taxta çıxmışdır. Rusiya imperatoru II Aleksandrın qohumu knyaginya Olqa ilә evlәnmişdi. I G. Yunanıstana İoniya a-rını (1864), Fessaliya vә Cәnubi Epiri (1881) birlәşdirmiş, Balkan ittifaqının (1912) yaradılmasında fәal iştirak etmişdir. Birinci Balkan müharibәsindәn [bax Balkan müharibәlәri (1912–13)] sonra sui-qәsd nәticәsindә öldürülmüşdür.

II G e o r q (20.7.1890, Afina yaxınlığında Tatoy qәsri – 1.4.1947, Afina) – Şlezviq-Holşteyn-Zonderburq-Qlüksburq sülalәsindәn Yunanıstan kralı [1922–24, 1935–41, 1946–47]. I Georqun nәvәsi. Taxta 1922 ilin sentyabrında atası I Konstantinin devrilmәsindәn sonra çıxmışdır. 1924 ilin martında Yunanıstan respublika elan edildikdәn sonra ölkәdәn qovulmuşdur. 1935 ildә referendum nәticәsindә yenidәn taxta çıxmış, tәyin etdiyi faktiki hakim gen. Metaksas ölkәdә diktator rejimi qurmuşdur. 1941 ilin aprelindә alman qoşunlarının Yunanıstana soxulmasından sonra Kiprә sığınmış, sonra Qahirәdә fәaliyyәt göstәrәn mühacir hökumәtinә rәhbәrlik etmişdir. 1944 ildә alman qoşunları Yunanıstanı tәrk etsәlәr dә, ölkәdә başlamış vәtәndaş müharibәsi sәraitindә Londonda qalmışdır. 1946 ilin sentyabrında referendum nәticәsindә monarxiyanın bәrpasından sonra yenidәn Yunanıstan taxtına çıxmışdır.