GEYGER (Geiger) Hans Vilhelm (30.9. 1882, Noyştadt-an-der Vaynştrase - 24.9.1945, Potsdam) - alman fiziki, Berlin ЕА üzvü (1937). Erlangen, Münxen və Mançester un-tlərində təhsil almışdır. E.Rezerfordun şagirdi olub. Mançester Un-tində işləmişdir (1906-1912). Berlində Fizika- Texnika İn-tunun laboratoriya müdiri vəzifəsində çalışmışdır. Kildə (1925 ildən), Tübingendə (1929 ildən) və Berlində (1936 ildən) un-tlərin prof.-u olmuşdur. 1908 ildə elektronun yükünü ölçmüş və Rezerfordla birlikdə ayrı-ayrı yüklü zərrəcikləri qeyd edən cihaz (bax Geyger sayğacı) ixtira etmişdir. 1909-10-cu illərdə G. (ingilis alimi E.Marsdenlə birlikdə) Rezerfordun rəhbərliyi ilə metal folqada alfa-zərrəciklərin səpilməsini tədqiq etmiş və onların bir hissəsinin 90° bucaqdan artıq meyilini təyin etmişdir. Bu fakt Rezerfordun atom nüvəsini kəşf etməsində mühüm rol oynamışdır. İngilis fiziki C.M.Nettolla birlikdə alfa-parçalanmanın alfa-zərrəciklərin enerjisindən ehtimal asılılığını müəyyən etmişdir (Geyger-Nettoll qanunu). Kompton effektində enerji və impulsun saxlanması qanununu təcrübi təsdiq etmişdir (V.Bоte ilə birlikdə).
