GƏGİRAN – Azәrb. Resp. Lәnkәran r-nunda kәnd. Gәgiran ә.d.-nin (Gәgiran, Dıryan, Jidi k.-lәri daxildir) mәrkәzi. R-n mәrkәzindәn 24 km şm.-q.-dә, Burovar silsilәsinin әtәyindәdir. Əh. 1503 (2017); tәrәvәzçilik vә heyvandarlıqla mәşğuldur. Tam orta mәktәb, mәdәniyyәt evi, kitabxana, tibb mәntәqәsi, ATS, poçt var. 

Tәdqiqatçıların ehtimalına görә, oykonim 13 әsrdә monqolların tәrkibindә Azәrb.-a gәlmiş türkmәnşәli kukir tayfasının adından vә talış dilindәki cәmlik vә mәkan bildirәn -an şәkilçisindәn ibarәt olub “kukirlәrin mәskәni” mәnasında işlәnir. Muğanda kәsilmiş ağacdan qalxan pöhrәyә dә “gәgir” deyilir. Ehtimal ki, meşә zolağı ilә zәngin әrazidә yerlәşәn kәnd kәsilmiş meşәnin yerindә salındığından belә adlandırılmışdır. Kәndin әrazisindә antik dövrә aid Coda yaşayış yeri, Şahalakon yaşayış yeri vә qәbiristanlığı, 3–8 әsrlәrә aid Buyәk yaşayış yeri, 13–16 әsrlәrә aid Gәgiran yaşayış yeri, 20 әsrә aid mәscid var.