GƏMİ UÇUŞ APARATI, g ö y ә r t ә  UA – aviasiya gәmisindәn qalxan vә oraya enәn gәmi tәyyarәlәri vә helikopterlәri. G.u.a.-ları, әsasәn, hәrbi tapşırıqları: qırıcı, hücum, kәşfiyyat, qayıqәleyhinә (sualtı qayıqların aşkarlanması vә mәhv edilmәsi), hәmçinin hәrbi-nәql. (desant çıxarma, hәrbi texnika vә yüklәrin daşınması) vә s. yerinә yetirir. Gәmi göyәrtәsindәn tәkәrli tәyyarәnin ilk uğurlu uçuşunu 14.11.1910 ildә Amerika tәyyarәçisi Y.Eli “Birmingem” kreyserindәn hәyata keçirmişdir; o, 18.1.1911 ildә “Pensilvaniya” kreyserinә ilk uğurlu eniş etmişdir. Hәmin illәrdә yaradılan hidrotәyyarәlәr katapult vasitәsilә gәmi göyәrtәsindәn qalxır, gәmi yaxınlığında suya enir vә sonradan gәmiyә qaldırılırdı.

İşçi olmayan vәziyyәtdә tәrpәnmәzliyinin tәmin edilmәsi mәqsәdilә bütün G.u.a.-ları aviasiya gәmisinә bәrkidilmәk üçün qurğularla tәchiz edilir. Tәyyarәlәr gәmidәn uçuş edәrkәn katapultdan, tramplindәn, enәrkәn aeroәylәclәrdәn istifadә olunur. Tәyinatından asılı olaraq müxtәlif gәmi helikopterlәri işlәdilir: Rusiyada Ka-27 (qayıqәleyhinә), Ka-29 (nәql.-hәrbi), Ka-31 (radiolokasiya nәzarәti) vә s.; ABŞ-da MH- 60R Seahawk (sualtı qayıqlar, gәmilәr vә yerüstü hәdәflәrlә mübarizә üçün); Fransada AS 565 Panther (axtarış-xilasetmә) vә s.