GƏRGİNLİKLƏRİN KONSENTRASİYASI – deformasiyaolunmuş bәrk cisim mexanikasında cismin sәthinin formasının kәskin dәyişdiyi oblasta vә ya daxili qeyri- bircinsliklәrә bitişik olan kiçik әtrafda gәrginliklәrin vә deformasiyaların pik şәklindә yüksәlmәsi hadisәsi.
Polad tәbәqәlәrdә deşiklәrin, lüklәrin, oyuqların yaxınlığında çatların әmәlә gәlmәsi gәmiqayırma mühәndislәrinә çoxdan mәlum idi. Hәmçinin böyük gәmilәrin avar vallarının dağılması da müşahidә olunurdu. Alman riyaziyatçısı Kirş 1898 ildә dairәvi deşikli lövhәnin uzanmasına (gәrilmәsinә) aid elastiklik nәzәriyyәsi mәsәlәsini hәll edәrkәn bu hadisәlәr nәzәri olaraq izah edildi. Hesablama göstәrdi ki, böhran nöqtәlәrin konturunda genәldici (uzadıcı) gәrginliklәr deşikdәn uzaqda olan gәrginliklәrdәn 3 dәfә çoxdur. Sonralar rus mexaniki Q.V.Kolosov (1909) vә ingilis mühәndisi Ç.İnqlis (1913) nәzәri olaraq elliptik deşiyin konturunda maks. gәrginliyi (σmaks) tәyin etdilәr.
