GƏRMƏŞOV (Euonymus) – gәrmәşovkimilәr fәsilәsindәn kiçik ağaclar, yaxud kollar cinsi. Budaqları çoxsaylı mәrcimәklәrlә örtülüdür. Yarpaqları qarşı-qarşıya düzülmüş, tamkәnarlıdır. Çiçәklәri, xırda, yaşılımtıl-ağ, yaxud qonurumtul, al-qırmızı olub, uzunsov çiçәk saplaqları üzәrindә, yarpaq qoltuqlarında yerlәşir. Meyvәlәri adәtәn toxumlarının asıldığı qırmızı, çәhrayı, narıncı karunkulu olan açılan qutucuqdur. 50–80 il yaşayır. Şm. yarımkürәsindә 180-әdәk növü, daha çox hissәsi Şәrqi vә Cәnub-Şәrqi Asiyada yayılmışdır. Azәrb.-da yabanı halda 5 növü bitir: Saqqalcıqlı G. (E. verrucosa), Avropa G.-u (E. euro-paea), mәxmәri G. (E. velutina), enliyarpaq G. (E. latifolia), hamarkök G. (E. leiophloea); Yapon G.-u (E. japonica) becәrilir. Yarpaqları alkaloidlәrlә zәngindir. Dekorativ bitki kimi becәrilir; bağ-park salınmasında istifadә olunur. Sintetik kauçukun yaranmasından әvvәl G.-un bir neçә növünün köklәri quttaperçanın (saqqalcıqlı G.-un köklәrindә 32%, Avropa G.-unda 20%-әdәk) alınması üçün әsas mәnbә sayılırdı; möhkәm oduncağından xırda әşyaların düzәldilmәsi üçün istifadә edilirdi.

Saqqalcıqlı gәrmәşov (Euonymus verrucosus) vә meyvәsi.