GİDDİNQS (Giddings) Franklin Henri (23.3.1855, ABŞ, Konnektikut ştatı, Şerman – 11.6.1931, Nyu-York ştatı, Skarsdeyl) – amerikan sosioloqu, ABŞ-da sosiologiyanın banilәrindәn biri. Qreyt-Barrinqtonda (Massaçusets ştatı) tәhsil almış, 1877 ildә Yunion-kolleci bitirmişdir. 1877–88 illәrdә jurnalist kimi çalışmışdır. 1888–94 illәrdә Brin-Mor-kollecdә (Pensilvaniya ştatı) dәrs demişdir (1892 ildәn oranın prof.-u). 1894–1928 illәrdә Kolumbiya un-tinin prof.-u (ABŞ-da sosiologiya üzrә ilk prof.) olmuş, orada sosiologiya fakültәsini yaratmışdır. Amerika sosiologiya cәmiyyәtinin prezidenti vәzifәsini tutmuşdur (1910–11).

Cәmiyyәti ilk növbәdә psixi fenomen hesab edәn G. sosiologiyanı psixologiya bazasında qururdu. “Nәsil şüuru”nu – insanların digәr insanları öz oxşarları kimi tanımaq bacarığını sosiallığın tәmәli sayırdı; bu bacarıq insanlarda qarşılıqlı fәaliyyәt prosesindә inkişaf edir vә müxtәlif sosial qruplaşmaların (etnik, dini, siyasi, sinfi vә s.) yaranmasına sәbәb olurdu. G. sosial hәyatı obyektiv vә subyektiv faktorların birgә fәaliyyәtinin yekunu olaraq şәrh edirdi. O, 1920-ci illәrdә yazdığı әsәrlәrindә statistik metodları tәtbiq etmәk hesabına sosiologiyanı dәqiq elmә çevirmәyә çağırırdı.