GİLQUD (Gielgud) Con Artur (14.4.1904, London – 21.5.2000, London) – ingilis aktyoru, rejissor. Sәhnә fәaliyyәtinә 1921 ildәn “Old Vik” (London) teatrında başlamış, Londonun digәr teatrlarında çıxış etmişdir. 1977 ilәdәk U.Şekspirin bütün pyeslәrindә baş rolların ifaçısı olan G.-un yaratdığı II Riçard vә Hamlet obrazları ona geniş şöhrәt qazandırmışdır. Digәr rolları: Trofimov, Treplyov, Verşinin (“Albalı bağı”, “Qağayı”, “Üç bacı”, A.Çexov), Edip (“Edip”, Seneka), Ceyms Kallifer (“Dam”, Q.Qrin), ser Politik (“Volnone”, B. Conson) vә b. G. rej. Kimi U.Şekspirin bir çox pyesini tamaşaya qoymuşdur. 1932 ildәn kinoda çәkilmişdir. “Gizli agent” (1936), “Şәrq ekspresindә qәtl” (1974), “Artur” (1981; “Oskar” mükafatı), “Yay gecәsindә yuxu” (1994), “Qәza” (2000) vә s. “Oskar”, “Qremmi”, “Emmi”, “Toni”, “BAFTA”, “Qızıl qlobus” mükafatlarına vә Yapon “İmperator mükafatı”na (1994) layiq görülmüşdür.