EMİN, Ağalarov Emin Araz oğlu, (d. 12.12.1979, Bakı) - Azərb. və Rusiya müğənnisi, bəstəkar, sahibkar. Azərb. Resp. xalq artisti (2018), Adıge Resp. əməkdar artisti. A.J.Ağalarovun oğludur. Maryomount Manhattan Kollecini (Nyu-York) bitirmişdir (2001). “Still” adlı ilk albomu 2006 ildə çıxmışdır (ingilis dilində). Digər albomları: “Incredible” (2007), “Obses sion” (2008), “Devotion” (2009), “Wonder” (2010), “After the Thunder” (2012), “More Amor” (2015), “Love is a Deadly Geam” (2016) və s. Çoxsaylı duetləri var: “Salam, Yer kürəsi”, Q.Leps ilə, 2014; “Deyə bilmirəm”, Ani Lorakla, 2016; “Yayın qəlpələri”, V.Meladze ilə, 2017 və s. 2016 ildən hər il Bakıda keçirilən “Jara” beynəlxalq musiqi festivalının təsisçisidir. Konsert fəaliyyətindən əldə edilən gəlirin böyük hissəsini xeyriyyəçilik işlərinə sərf edir. Müxtəlif nominasiya üzrə “Qızıl qrammofon”, “ZD-Awards”, “YUNA” mükafatlarına, o cümlədən “Azərbaycandan olan ən gözəl ifaçı” nominasiya üzrə mükafata layiq görülmüşdür. Bir sıra mahnıların (“Azərbaycan”, “Gizlicə Bakıya qaçaq” və s.) müəllifidir.
