GİZLİÇİÇƏK (Crypsis) – taxıllar fәsilәsindәn birlәpәli bitki cinsi. Çiçәk qrupu sıx, başcıqvarı, üst tәrәfdәn yastı, yaxud az qabarıq, üst yarpaqların 2–3 genişlәnmiş qını ilә әhatәlәnmişdir. Çoxsaylı xırda sünbülcüklәri oturaq, birçiçәklidir. 2 sünbül pulcuğu çiçәk pulcuqlarından qısadır. Pәrdәşәkilli çiçәk pulcuqlarının qılcığı vә çiçәk zarı yoxdur. 2 erkәkciyi var. Dişiciyin ağzı sapşәkilli, qısa lәlәklidir. Cәnubi Avropadan Türkmәnistan vә Qafqaza qәdәr 3 növü yayılmışdır. Azәrb.-da 1 növü – tikanlı G. (C.aculeata) Xәzәr-Kür ovalığında, Lәnkәran, Muğan zonalarında, nәmli vә qumluca, şoranlaşmış torpaqlarda, yol vә göl kәnarlarında bitir. Yem bitkisidir. Hәr növ qaramal vә ev quşları (qazlar, ördәklәr) tәrәfindәn yeyilir.
Tikanlı gizliçiçәk (Crypsis aculeata).
