GÖNTS (Göncz) Arpad (10.2.1922, Budapeşt – 6.10.2015, Budapeşt) – Macarıstan dövlәt vә siyasi xadimi, yazıçı. 1944 ildә Budapeşt Un-tinin hüquq fakültәsini bitirdikdәn sonra hәrbi xidmәtә çağırılmışdır. Müharibәnin qurtarmasına az qalmış fәrarilik etmişdir. Qırmızı ordu hissәlәrinin Macarıstan әrazisinә daxil olmasından sonra antikommunist gizli qrupların fәaliyyәtindә iştirak etmiş, bir neçә dәfә hәbs olunmuşdur. 1945 ildәn Xırda Kәnd Sahibkarlarının Müstәqil Partiyasının gәnclәr tәşkilatının rәhbәri vә “Nemzedék” (“Nәsil”) jurnalının baş redaktoru idi. 1952–56 illәrdә Macarıstanın Aqrar Elmlәr Un-tindә tәhsil almışdır. Macarıstan üsyanının (1956) iştirakçısı olmuş, 1958 ildә ömürlük hәbs cәzasına mәhkum edilmiş, 1963 ildә әfv olunmuş vә azadlığa buraxılmışdır. 1965 ildәn azad yazıçı kimi fәaliyyәt göstәrmişdir. Bir sıra roman vә teatr pyeslәrinin, o cümlәdәn “Sәndәl geymiş adam” (1974), “Pessimist komediya”nın (1986) müәllifidir. 1988 ildә Azad Demokratlar İttifaqı Partiyasının tәsisçilәrindәn biri, 1989 ildәn partiyanın idarә heyәtinin üzvü idi. 1989 ildә İnsan hüquqları liqasının Budapeşt bölmәsinin, hәmçinin macar PEN-klubunun rәhbәri olmuşdur. 1990 ilin may–avqust aylarında Macarıstan parlamentinin sәdri vәzifәsini icra etmişdir. 1990 ilin avqustundan – 2000 ilin avqustuna kimi Macarıstan Resp.-nın prezidenti olmuşdur. Macarıstanın Avropa iqtisadi vә hәrbi-siyasi ittifaqlarına inteqrasiyasında fәal iştirak etmişdir.
