GÜNƏŞ TELESKOPU – Günәşi müşahidә etmәk üçün astronomik alәt; süzgәclәrlә (mәs., Günәşin xromosferini tәdqiq etmәk üçün), yaxud Günәş tacının qeydedicisi (Günәş tutulmaları olmayan halda Günәş tacını tәdqiq etmәk üçün) tәchiz edilmiş adi teleskopdan, ya da Günәşә selostat vasitәsilә yönәldilәn tәrpәnmәz alәtdәn (süzgәclәrә ehtiyac olmur) ibarәtdir. Optik oxun istiqamәtindәn asılı olaraq üfüqi vә qüllәvarı tәrpәnmәz G.t.-larına ayrılır. G.t.-nda xüsusi avadanlıqlardan (mәs., günәş maqnitoqrafı) istifadә edәrәk tәsvirlәri, maqnit sahәsinin spektrlәri vә xәritәlәrini almaq olur. Günәş müşahidәlәrinin böyük hissәsi kosmik günәş rәsәdxanalarında (mәs., SOHO – “Solar & Heliospheric Observatory” beynәlxalq rәsәdxanasında) quraşdırılmış G.t.-larının kömәyilә hәyata keçirilir.
İsveç günәş teleskopu. La-Palma adası (Kanar arxipelaqı).
