GÜRAN Nәzmi Ziya (1881, İstanbul – 11.9.1937, İstanbul) – türk rәssamı. Mülkiyә mәktәbini (1901), İstanbul Zәrif Sәnәtlәr Akademiyasını (1908) bitirmişdir. Hәmin il Paris Julian Akademiyasında bir müddәt mәşğәlәlәrdә iştirak etmiş, Milli Zәrif Sәnәtlәr Ali Mәktәbinә daxil olmuş, Fernan Kormondan dәrs almışdur. Almaniya vә Avstriyaya sәfәrdәn sonra 1914 ildә Türkiyәyә qayıtmışdır. İzmirdә yaşamış, pedaqoji kollecdә dәrs demiş, әyalәt tәhsil şöbәsindә müfәttiş işlәmişdir. Birinci Dünya müharibәsindәn sonra Zәrif sәnәtlәr sәnaye mәktәbinin direktoru olmuşdur (1918–1921 vә 1923–1927). Avni Lifij vә Hikmәt Onatla birlikdә plener rәssamlığının liderlәrindәn, hәmçinin impressionizm cәrәyanının ilk nümayәndәlәrindәn biridir. İstanbul mәnzәrәlәri әks olunan tablolarında (“Rumelihisarı vә Boğaziçi”, 1930-cu illәr; “Qoç kafesi”, 1931; “Qәndillidәn Bәbәyin görünüşü, 1934; “Taksim meydanı”, 1935; “Liman mәnzәrәsi”, 1937 ilәdәk; vә s.) isti vә soyuq rәnglәrdәn mәharәtlә istifadә etmişdir. Əsasәn, mәnzәrә rәsmlәri çәkәn G. bir sıra portretlәr dә (M.K.Atatürk, Nazim Hikmәt vә b.) işlәmişdir. Yaradıcılığına fransız boyakarı K.O.Monenin tәsiri olmuşdur. Əsәrlәri İstanbul Dövlәt Rәssamlıq vә Heykәltәraşlıq Muzeyindә vә şәxsi kolleksiyalarda saxlanılır.
Güran Nәzmi Ziya. “Taksim meydanı”. 1935. Şәxsi kolleksiya.
