HABBL TELESKOPU – kosmik teleskop; NASA vә Avropa kosmik agentliyinin birgә layihәsi. E.Habblın şәrәfinә adlandırılmışdır. Teleskopun әsas güzgüsünün diametri 2,4 m, ekvivalent fokus mәsafәsi 7,6 m-dir. H.t. geniş diapazon spektrindә, o cümlәdәn 115 nm-dәn çox uzun dalğalarda işlәmәk üçün nәzәrdә tutulmuşdur. Onun quraşdırıldığı YSP 25.4.1990-da hünd. 540 km vә mailliyi 28,5° olan dairәvi orbitә çıxarılmışdır. Sonrakı illәrdә (1993, 1997, 1999, 2002, 2009) H.t.-na bir neçә ekspedisiya tәşkil edilmişdir (konstruksiyadakı qüsurları aradan qaldırmaq, günәş batareyalarını, köhnәlmiş cihazları dәyişmәk vә s. üçün). H.t. vasitәsilә göy cisimlәrinin (ulduzlar, dumanlıqlar, qalaktikalar, planetlәr, kometlәr vә s.-nin) 1 mln.-dan çox şәkli alınmış, bәzi ulduzlara qәdәr olan mәsafәlәr ölçülmüş, ilk dәfә Saturn vә Yupiterdә UB sahәdә üfüq parıltıları qeyd edilmiş, ekzoplanetlәr haqqında mәlumatlar alınmış vә s. Alınan nәticәlәr müasir astronomiyanın inkişafına ciddi tәkan vermişdir. H.t.-nun işinin idarә olunması vә alınan mәlumatların emalı mәqsәdilә Kosmik Teleskop İn-tu (ABŞ), hәmçinin analoji Avropa Kosmik Teleskopun Koordinasiya Mәrkәzi yaradılmışdır.
