HACIYEV Rauf Soltan oğlu (15.5.1922,Bakı – 19.9.1995, Bakı) – Azәrb. bәstәkarı. SSRİ xalq artisti (1978). Azәrb. Bәstәkarlar İttifaqının (1976 ildәn, 1979–85 illәrdә birinci katib) vә SSRİ Bәstәkarlar İttifaqının (1986 ildәn) katibi olmuşdur. Azәrb. Dövlәt Konservatoriyasını bitirmişdir (1953, Q.Qarayevin sinfini). H.Azәrb. Dövlәt Estrada Orkestrinin tәşkilatçısı vә bәdii rәhbәri (1956–65), Azәrb. Dövlәt Filarmoniyasının direktoru (1964–65), Azәrb. SSR mәdәniyyәt naziri (1965–71) olmuşdur. Müxtәlif janrlı әsәrlәrin müәllifi kimi tanınan H. Azәrb. operettasının inkişafında mühüm xidmәt göstәrmişdir. Onun “Romeo mәnim qonşumdur” (1960; 1963 ildә ekranlaşdırılmışdır), “Kuba, mәhәbbәtim mәnim” (1963), “Tәbәssümünü gizlәtmә” (“Qafqazlı qardaşqızı”, 1969), “Dördüncü fәqәrә” (1973), “Ana, mәn evlәnirәm” (1976), “Yolayrıcı” (1981) operettaları geniş şöhrәt qazanmışdır. Ü.Hacıbәylinin әsәrlәrinin motivlәri әsasında televiziya üçün yazdığı "Ordanburdan" musiqili komediyasını dahi ustadın xatirәsinә ithaf etmişdir. Operettaları xarici ölkәlәrin bir sıra teatrında tamaşaya qoyulmuşdur. H. ilk professional Əlcәzair baletlәrinin [“Üç inqilab” (1974), “Alov” (1975), “Hürriyyә” (1979)], elәcә dә “Lәzgihәngi” (1969), “Yallı” (1970) balet miniatürlәrinin müәllifidir. Bәstәkarın 100-dәn artıq lirik, vәtәnpәrvәr ruhlu mahnıları ("Azәrbaycanım", "Bakı", "Sevgilim", "Saçlarına gül düzüm", "Yaz gәlir", "Bәnövşә" vә s.) Azәrb. mahnı janrının inkişafında әhәmiyyәtli rol oynamışdır. Digәr әsәrlәri: 2 simfoniya ("Gәnclik", 1953; 1982), violin ilә ork. üçün konsert (1952), 3 oratoriya, 5 kantata, "Şeyx Sәnan", "Sәbuhi", "Hәzi Aslanov" simfonik poemaları, teatr tamaşalarına, kinofilmlәrә (“Qara daşlar”, 1956, rej. A.Quliyev; “Kölgәlәr sürünür”, 1958, rej. İ.Əfәndiyev, Ş.Şeyxov; “Bir qalanın sirri”, 1959, rej. Ə.Atakişiyev; “Əhmәd haradadır”, 1965, rej A.İsgәndәrov; “Qaraca qız”, 1966, rej. Ş.Mahmudbәyov; “Torpaq. Dәniz. Od. Sәma”, 1967,rej. Ş.Mahmudbәyov) musiqi vә s. H. 1971–75 illәrdә Əlcәzair Xalq Demokratik Resp.-nda mәdәniyyәt qrupunun rәhbәri işlәmişdir. Azәrb. SSR Ali Sovetinin (7, 10 vә 11-ci çağırış) deputatı olmuşdur. Lenin ordeni, Qırmızı Əmәk Bayrağı vә "Şәrәf nişanı" ordenlәri ilә tәltif edilmişdir.
